Deklarasion de Independensya en Ladino (AKY)
Trezlado al Ladino (AKY) por Robert Altabet
En onor del 250 Aniversario de los Estados Unidos de Amerika
1776–2026
Click here to download the full PDF, including pages in Ladino Rashi script:
Declaration250
Esta traduksion fue preparada para estudio i diskusion en la klasa de Ladino i para kompartir kon la komunita Sefaradi.
La Deklarasion de Independensya es uno de los dokumentos politikos mas importantes de la istoria moderna. Sus ideas reflektan la influensya de pensadores komo John Locke, ken enfatisó los derechos naturales del ombre, la libertad individual, i el prinsipio de ke los governos toman su legitimidad del konsentimyento de los governados.
La Deklarasion no es solamente una deklarasion de derechos naturales. Es tambyen una deklarasion dirijida al mundo entero para eksplikar i djustifikar una aksion revolusionaria. En este sentido, sus autores sigyeron una tradision de render kuenta al publiko i a la umanidad ke se topa en los eskritos de John Milton. En su ovra Areopagitica, Milton defendyo la importansya de ekspozer ideas libremente ante el publiko i de presentar argumentos a la opinion de la umanidad.
Esta versyon intenta reflektar no solamente el kontenido del dokumento orijinal, ma tambyen el estilo de una prosa Sefaradi publikada en una gazeta del fin del siglo diezemueve del Imperio Otomano.
En el KONGRESO, 4 de djulyo de 1776.
Deklarasion unanime de los trese Estados Unidos de Amerika.
Kuando en el korso de los akontesimyentos umanos, se aze nesesario ke un puevlo desate los ataderos politikos ke lo ataron kon otro, i ke tome entre las potensyas de la tiera el lugar separado i igual al kual le dan derecho las Leyes de la Natura i del Dyo de la Natura, el respekto devido a las opiniones de la umanidad demanda ke este puevlo deklare las razones ke lo empushan a esta separasion.
Mozotros tenemos estas verdades por evidentes de si mizmas: ke todos los ombres fueron kriados iguales; ke el Kreador les dio siertos derechos ke no se pueden kitar; i ke entre estos se topan la Vida, la Libertad i la bushka de la Dicha.
Ke para asegurar estos derechos, los Governos fueron establesidos entre los ombres, tomando sus poderes djustos del konsentimyento de los governados.
Ke kada vez ke una forma de governo se aze destruktiva kontra estos fines, es derecho del puevlo de mudarla o de desazerla, i de estableser un muevo governo, fondado sovre tales prinsipios i organizado en tal manera ke les pareska mas apropyado para asegurar su seguridad i su dicha.
La prudensya, de vedra, amostra ke governos ke egzisten desde muncho tyempo no deven ser mudados por kavzas leves i pasajeras; i ansi toda eksperyensya amostra ke los ombres estan mas dispuestos a sufrir, mientras los males son suportavles, ke a enderesar las kozas aboliyendo las formas a las kuales estan akostumbrados.
Ma kuando una larga seria de abuzos i uzurpasyones, syempre dirijidas al mizmo fin, amostra un dizenyo de someterlos a un despotizmo absoluto, es su derecho i es su dever de abolir tal governo, i de proveer muevos guardianes para su siguridad futura.
Tal fue el sufrimyento pasiente de estas Kolonias; i tala es agora la nesesidad ke las forsó a mudar sus anteriores sistemas de governo. La istoria del presente Rei de la Gran Bretanya es una istoria de injurias i uzurpasyones repetidas, todas teniendo por objektivo el establesimyento de una tiraniya absoluta sovre estos Estados. Para provar esto, sean presentados los echos a un mundo onesto.
Algunas de las Reklamasyones Prinsipales
El reushó de aprobar leyes nesesarias i provechozas para el bien publiko.
El disolvió cuerpos reprezentativos porke se opusieron kon firmeza a sus invazyones sovre los derechos del puevlo.
El mantuvo entre mozotros armadas permanentes en tyempo de pas, sin el konsentimyento de las legislaturas.
El izo al poder militar superior al poder sivil.
El impuzo taksas sovre mozotros sin muestra reprezentasion.
El privó a munchos del benefisyo de djuzgamyento por jurado.
El transportó personas a ultramar para ser djuzgadas por pretendidos delitos.
El suspendió muestras propias legislaturas i se deklaró investido del poder de governarmos en todos los kavzos.
[En este punto, el dokumento orijinal kontinua kon otras numerosas reklamasyones kontra el Rei i el governo britaniko.]
En kada etapa de estas opresyones, mozotros pedimos remedio en los terminos mas umildes; muestras repetidas petisyones fueron respondidas solamente kon repetidas injurias. Un Prinsepe, kuyo karakter es markado por kada akto ke puede definir un tirano, no es digno de ser rei de un puevlo livre.
Tampoko faltimos de atensyon a muestros ermanos britanikos. Les advertimos de tyempo en tyempo sovre las tentativas de sus legisladores para estender una jurisdiksyon injusta sovre mozotros. Les rekordimos las sirkunstansyas de muestra emigrasyon i establesimyento aki. Apelimos a su djustisya i a su magnanimidad, i les suplykimos, por los lakos de muestra komunidad, ke desaprovaran estas uzurpasyones. Ma eyos tambyen fueron sordos a la boz de la djustisya i del parentesko.
Por esto, mozotros devemos aresivir la nesesidad ke amostra muestra separasyon, i konsiderarlos, komo konsideramos al resto de la umanidad: enemigos en la gera, ma amigos en la pas.
